Groot opwinding binnekort by die Madeliefie Makietie

Strandfontein is in rep en roer vir die Madeliefie Makietie wat vir die heel eerste keer op dié prentjiemooi Weskus-stranddorp aangebied word. Die opwinding onder kunstenaars is bykans tasbaar.

“Ek kan nie wag om by die Madeliefie Makietie op te tree nie. Ek sien dit is so gewild, so ek is baie opgewonde,” sê die gewilde sangeres, Juanita du Plessis, oor dié fees wat op Vrydag, 29 en Saterdag, 30 September plaasvind.

Altesaam 23 van ons land se topkunstenaars bied vermaak aan feesgangers, waaronder Emo Adams, Bobby van Jaarsveld, Juanita du Plessis, Willem Botha, Die Broers, Pieter Koen, Andriëtte, Leah, Brendan Peyper, Lianie May, Jay, Neil Somers, Klikkerland, Lollos, Dobbelsteun, Lee Scott, Stephan Vermaak, Werner Coetser en Vito.

Lee Scott sê op sy beurt: “Ek kan nie meer wag om julle by die Madeliefie Makietie te sien nie. Ek is mal oor daardie deel van Suid-Afrika. Ek tel letterlik die dae af.”

“Kry vir ons op die Weskus by die Makietie. Jy sal vir jouself moet kom kyk op 30 September,” skerts Emo Adams.

Vir meeste van die kunstenaars is dié fees ’n eerste en vir sommige ’n eerste besoek op Strandfontein. Vir Werner Coetser, sepiester en akteur, wat as seremoniemeester optree, is die Weskus die mooiste plek. “Ek was so vinnig op Vredendal. Al wat ek weet, is dat dit regtig mooi is en dat die mense vriendelik is,” sê hy.

Strandfontein het ook ’n nuwe voorkoms, met die A-blok kampterrein wat oorgedoen is vir die feesgangers wat hierdie juweel-dorpie gaan besoek. Die A-blok is herstel, gras is onlangs geplant en dit lyk ongelooflik met die nuwe ablusiegeriewe en chalets wat ook deur die fees-organiseerders, in samewerking met die Matzikama-munisipaliteit, oorgedoen is.

“Ons is trots daarop om besoekers van buite ons op spog-kusdorpie te verwelkom en vanjaar bied ons vir ieder en elk die geleentheid om dit te beleef. Ons Weskus-mense is bekend vir ons gasvryheid en ons unieke Weskus-kos en -wyne gaan besoekers in vervoering hê,” sê Stokkies van Zyl, Madeliefie Makietie-organiseerder.

“Ek kan nie wag vir die fees nie. Dit gaan een groot jol wees,” vertel die sanger, Pieter Koen, opgewonde.

Besoek www.madeliefiemakietie.co.za vir meer inligting, die volledige program en om jou verblyf te bespreek. Kaartjies kan by Computicket, Shoprite/Checkers en House & Home gekoop word of by 0861 915 8000.

Bly op hoogte van die jongste Madeliefie Makietie-nuus op Facebook (facebook.com/MadeliefieMakietieSA), Twitter (twitter.com/madeliefieM) en Instagram (instagram.com/madeliefiemakietie/).

 

0 Comments

Leave a reply

Your email address will not be published. Required fields are marked *

*

©2018. Digitale projekbestuur deur Lumico.

Log in with your credentials

Forgot your details?