Goeie maniere kan jou loopbaan help

Daar is ’n gesegde dat goeie maniere deure kan oopmaak wat selfs die beste opleiding nie kan nie. Jonger werknemers wat etiket in die werkplek vroeg bemeester en ’n professionele beeld uitstraal, trek die aandag en word deur hul seniors raakgesien. ’n Werknemer se professionaliteit word gemeet aan die mate waarin sy werkgewer op hom kan staatmaak – ook om te voldoen aan die norme en verwagtinge van die sakewêreld en die samelewing.

 

Dit maak saak dat jy betyds opdaag vir werk, respek betoon aan jou klante deur professioneel aan te trek, en te onthou om ‘asseblief’ en ‘dankie’ te sê soos jou ma jou geleer het. Sou jy besluit om jou nie aan dié reëls te steur nie, bewys jy jouself ’n onguns. In ’n oopplan-werkomgewing raak goeie maniere onontbeerlik vir produktiwiteit en harmonie. Dit is ’n kwessie van wedersydse respek toon. As kollegas in ’n oopplan-kantoor hard gesels of deurentyd op die foon klets, sukkel ’n mens om te konsentreer. Dus moet almal mekaar in ag neem.

 

Werkgewers kyk deesdae skerper na werknemers se emosionele intelligensie, oftewel hul vermoë om bewus te wees van hul eie én van ander se emosies. Die werkplek se afhanklikheid van tegnologie, veral om te kommunikeer, dra ook daartoe by dat mense ál meer afgestomp raak en weer eens is dit veral jonger werknemers wat aan die kortste ent trek.

 

Só lyk goeie maniere by die werkplek:

  • Name is belangrik. Onthou die name van mense aan wie jy voorgestel word. Maak ook seker dat jy die name reg spel as jy ’n e-pos stuur en maak veral seker dat jy die persoon se regte posbenaming byvoeg wanneer jy hom of haar aan iemand anders voorstel.
  • Moenie kritiseer nie. ’n Mens mag verskil oor hoe ’n kollega ’n spesifieke situasie gehanteer het, maar dis nie jou plig om ander te beoordeel op grond van jou persepsie van reg of verkeerd nie. Jy is verantwoordelik vir jouself en jou eie gedrag.
  • Wees bedagsaam wanneer jy ander se tyd gebruik. Vra of dit geleë is om te praat as jy iemand bel, moenie laat kom vir afsprake nie en hou jou bespreking kort en kragtig as jy kwessies op vergaderings aanroer.
  • Stuur ’n dankiebrief: Dit is ’n kuns om vir iemand ’n bedankingsbrief te stuur, maar dit is een wat jy moet bemeester as jy verhoudinge wil bou. As iemand ekstra moeite vir jou gedoen het, behoort jy hom of haar spesiaal te bedank.
0 Comments

Leave a reply

Your email address will not be published. Required fields are marked *

*

©2017 . Digitale projekbestuur deur Lumico.

Log in with your credentials

Forgot your details?